ما بين ليله وليله. طَيْفِكْ الغالي
يسأل عن أخبار قلبي .. من تركتيني!
يعود جرحي، وينشِدْني عن أحوالي
وافي .. يا لَيْتِكْ مِثِلْ طَيْفِكْ تراعيني!
يا اللّى رَحَلْتي .. خذَلْتي أصْدَقْ آمالي
واعْذَبْ قصيدٍ كتبته واجْمَل سْنيني
دَمْع إشتياقي على خَدّ الرجا سالِ
ضاع التلاقي .. و بات الوَجْد يَضْنيني
من يوم رِحْتي ولا حالي غدى حالي
ذِبْلَتْ ورود المحبّه في بساتيني!!
وتمضي الليالي ولا تمضين عن بالي!
محتاج قربك .. وقربك وينه وْوَيْني؟!
ْيَبْكِيْك دَرْبٍ مشيتي فيه لِوْصالي
وْيَبْكِيْك عِشْقٍ .. غَرَسْتيه فْـ شَراييني
رِحْتى ولا عاد به شَيٍ تبَقَّى لي
ما غير طَيْفِكْ أبَد ما غاب عن عيني
يعود جَرْحي وْيَنْشِدْني عن أحوالي
ويسأل عن أخبار قلبي من تَرَكْتيني