يا حروف الشِّعْر سِيْري واكتبي أحْلى قصيده

واعزفي لَحْن المشاعِر وانثري أغلى الورود

واصلي إبداع شِعْرِكْ وافتحي صَفْحَه جديده

واوصفي إحساس شاعِر وافي بْكِلّ الوعود

إبتديت آخِطْ شِعْري وسْط صفحات الجريده

وما لقيت لْهَالمعاني من كتَبْ فيها ردود

أكْتِبْ الشِّعْر وْأعِدّه وطْلبوا منّي أعيده

ومن نطَقْت حْروف شِعْري صفّقوا كل الوجود

إن مشيت فْـ دَرْب شِعْري أعْرِف انّي سِرْت سِيْده

شاعِرٍ صاغ القوافي، وْصَفّها صَفّ الجنود

تلقى أشعاره تميّز.. في معانيها الفريده

ما يهمّه قول ناسٍ لا وَلا هَمّه حسود

الشِّعِر مِنّه تمكّن والقوافي بْكَفّ إيده

إعتلى فوق المعالي والقصايد له شهود

من يحاوِل في حروفي يصطنع فيها نقيده

أقْلِبْ القيفان فوقه واشْعِلْ حْروفي وقود

وارمي بْقيفان شِعْري طَلْقةٍ يا هي سديده

ما بتخطي من رميته لو وقَفْ بين الحشود

وان بغيت أمْدَحْ رفيقٍ يبْشِر بْكلْمه سعيده

تبقى تاجٍ فوق راسه لو على مَرّ العهود

وابقى دايم في حروفي أكْتِبْ الشِّعْر وْأجِيْده

واصْنَعْ بْأبيات شِعْري وِبْقوافيها عقود

تفْتِخِرْ باللى كتَبْها وصاغها أفْكارٍ مفيده

والقصايد من حروفه في معانيها تجود