كحيل العين

السبت 9 ربيع الاول 1424 هـ الموافق 10 مايو 2003 شعر: عبدالله الشامسي على مقدار حبّك واحترامك يا كحيل العين أبارْسِلْ لك تحيّات الغرام لْخاطر عْيونك عسى تْليق بْمقامك ولْجنابك يا الحبيب تْزين عسى ربّي يقدّرني أوفّي يا الغلا دْيونك سرى لك هاجس أشواقي حمل حب وغرام سْنين معاه احساسي الصادق وهمساتي يناجونك سرى لك قلبي المغرم على خَدّ السحاب يْبين نواك وما نوى غيرك.. ألا يا روح مَفْتونك عشقتك حاضر وغايب عشقتك باوّل التكوين قبل لا ينوِلدْ في الكون حب.. أصبَحْت مجنونك سليل الطيب والعفّه وعنوان الوفا والزين تراه القلب وِعْيوني يا عمري كم يحبّونك حبيبي باوصفك لكن وش اوصف بس وين وْوين إذا عَنْك أسْأل أبياتي أنا القاهِنْ يبَدّونك دخيل الوردتين اللي رِبَنْ في روضة الخَدّين دخيلْ رْموش كسلانه تضمّ الموت بِجْفونك دخيل الثَلْج لى يلثم لظى هالجمرتين بْلين أرِدّ الشان في الرمَّان لى مالَتْ بهْ غصونك وفي ذاك الظلام اللى تحدَّرْ من ورا الكتفين سواده حالكٍ يشبه سواد أيّامي بْدونك وْحَبَّاتْ العَرَقْ يللى بها الياقوت صار رْهين على نَحْرٍ عجَزْ حتى اللجين يْكون في لونك طلبتك بالغرام اللي جَعَلْ وسط الجسد روحين وقلبٍ ينبض بحبّك.. ونبضاته ينادونك إذا مَرّيت في بالك تذكَّرْ يا الغلا شيئين: محبٍّ عاش لعيونك.. ومات لْخاطر عْيونك

طباعة Email
تعليقات

تعليقات