قبل السفر

شعر: كحيلان قالت أبي منّك طلب لو تلبّيه لاكون لك ممنونه بكل روحي عطني وعَد بانّك تتمّه وتقضيه إن كان يا سِيْدي لنجواي توحي أطلبك تعتقني وذا كل ما ابيه من حب كبّلني وْجَددْ جروحي الحب يا اللي باوّله ذقت صافيه واسقى ظما قلبي بشوقٍ جموحي ومازال للخفاق ساقي ويرويه حتى رويت مْن الهوى عقب صوحي ومازلت لي بالعطف باقي وتبديه ومنك المشاعر بالمحبّه تبوحي يا الصادق الوافي عِدَتْك المشاريه هذي ترى لي رغبةٍ بالنزوحي ولا تحسب أنّه حد به غيرك أغليه حاشاك حَدٍ في خيالي يلوحي ناوي ولي قلبٍ تعب قبل تدميه بطعون صَدّك عقب أنس وفروحي أدري بأنّه وصلنا البعد تاليه والبعد ما اقوى له ولا به مزوحي واطلبك قلبي لاتعوّد وترميه في حبّك اللي للجوارح ذبوحي ذا كل ما أطلب ولي لو تلبّيه لاكون لك ممنونه بكل روحي

تابعوا فكر وفن من البيان عبر غوغل نيوز