سالفة نشعة وجلعوط

أنا على يقين أن البدو لم ولن يكونوا على هذه الحال التي تصورهم بها تلك التوليفات الغريبة والتي يطلق عليها ظلما وعدوانا لفظ مسلسلات بدوية والبدو والبداوة منها براء.

جلعوط: ويش رايك يخوي يا «جعيفان» لو إني ذبحت «قطيفان» ذبح الشاة وخليت لحمه طعاما لصقور البر والذيابة.

جعيفان: بالعون يخوي يا «جليعيط » انك معاك حق في اللي تقوله، لانه «قطيفان» كل العرب تعرفه انه خسيس ونذل وجبان بوفعايل شينة، بس انا ابغيك تهدي شوي من اعصابك و.. «ريلاكس» شوي وخلي عنك هالـ «نرفزة»!

جلعوط: اخ وانا اخو «فلحة».. والله ما يهدالي بال، ولا يداعب النوم جفوني الا اقطع من لحمه قطعة واجبسها واساويها «طرشي لحم»!

جعيفان: وإن كنت مشتهي «الطرشي» ياخوي..

جلعوط: أي طرشي الله يهداك، الخسيس خطف مني نعجتين من الحلال اللي كانت تسرح صوب الغدير وشرد، وتقول لي هدي اعصابك.. وريلاكس..

جعيفان: وكاد ها الكلام.. يوبا

جلعوط: بالعون انه وكاد، عجل كيف أقول مثل هذا الكلام إلا بعدما توكدت بنفسي من الرعيان وبعدها شن غارات متوالية على الحلال..

جعيفان: والرعيان.. وشهي شغلتهم..؟

جلعوط: نواطير يا خوك، لكن «البارودة» ما كانت معمرة ما فيها «فشك».. وفوق كل هذا يبغي يخطف مني «نشعة» بنت عمي «بطيحان»، وانت عارف اني هلكت يا الله اقنعت ابوها انه يزوجني اياها بعد ما طلبها «صخيلان» ولد عمي «فضيحان» وسكت يوم انه عرف ان الحب ذابحني، ويوم عرف انه ابوها، طلب مني خمسة آلاف من النوق الحمر مهرلها وحالف إنه يعدهم على «الكالكوليتر» ما ينقص منهم ولا هيد.

جعيفان: سالفتك مهي هينة، وامورك اشوف كلها متشربكة شرباكة.

جلعوط: أنا ما قصرت عليهم بشي حتى «التركيشن» شريته لهم ..

جعيفان: وش هذا اللي تقول عنه..

جلعوط: تراك جاهل يخوي بأمور «الفيرنشر» هذا «التركيشن» الله يسلمك ترى صندوق حديد في واحد جالس بداخله وبيده مهفة تجيب هوا بارد ويشتغل «عالكرهبا»..!!

aalsanjari @yahoo.com