لا تبتعِدْ عن حياتي لا تخَلّيني
القلب مشتاق لك والروح وَلْهانه
فديت صوتك وهَمْسِكْ لى يسّليني
يا اللى حياتي بدونك ما لَهَا خانه!
خابِرْك في الروح واثْرِكْ في شراييني!!
من زحمة الشوق لك اْلِعْروق مَلْيَانه
في غَفْوتي أو صَحُوْتي لا توصّيني
ذِكْرِكْ على وَتر قلبي يعْزِف ألحانه
عطْني يمينك وْخِذْني وانْشِغِلْ فيني
ذَوِّبْ خفوقي وْعُود وْشِبّ نيرانه
جَمِّعْ شتاتي وْجَرّحني وْدَاويني
واحْرِقْ شعور العذول وْشَتِّتْ أذهانه
تعطيني بْشَيّ وِبْلا شَيّ تعطيني
أنا اتّجاهات قلبك واكْبَر أركانه
وِدّي بْحِصَانَتْك تحفظني وتحميني
ما وِدّيْ غيرك يشاركني بوجدانه
وان غِبْت عن نور عيني يا بَعَدْ عيني
أحِسّ دونك حياتي ما لها خانه!