على أثَرْ ما صابني من نوبة إحباط وْضجَرْ

كَنّي باقول الله أكبر ما بقى شيّ أخسره

كانت طموحاتي تعَدِّي بي على سَطْح القمر

واليوم ما عادَتْ تجاوِز بي حوافْ المسطره

ماني بشاعر بَسّ لي معنى ولي وَزْن وْبَحَر

بالمختصر هاوي شِعِرْ خارج حدود السيطره

أفنيت في الدنيا عمر أتْعَلَّمْ إش لون البشَر

تخطي وترجع ترتكب نَفْس الخطا وِتْكَرّره

وْكِلّ ما قِلْت اسْتَتَبّ الأمن والحال استقر

فجأه لقيت أهل الشِّعر واجوا الشِّعِر متوتّره

وش تنتظر يا مِتْقِنْ اللعبه باساليب (الهَكَر)

وش تنتظر والظاهره ترقى لحَدّ المسخره

مَلّيت مَلّيت أسمَعِك صَبِر صَبِر صَبِر صَبِر

إلى متى تباني أتْحَمَّلْ جدال وْثَرْثَره

أمَّا الهنوف اللى تمرّ الذاكره صوت وصوَر

استنفدت كل الصبر من أوّله لين آخره

تخطي وتجرح كل مرَّه والعِذِر نَفْس العِذِر

يا كثر ما هي تستغلّ العفو عند المقدره

خسرتها ضمن الطموح اللى على سَطْح القَمَر

واستغفر الله لو باقول أن ما بقى شَيّ أخْسره