السبت 24 صفر 1424 هـ الموافق 26 ابريل 2003 شعر: ماجد عبد الرحمن يقول اللي كتب خافي جروحه بصلفات الليالي زاد نوحه رشف من كاس ساعات الليالي قراطيعٍ من العين الذبوحه عليه الله مجمولٍ صدفني على جمع الملا شيّد صروحه تشلّل فكري الواعي بنظره نواعيس الهَدَبْ ترسل شروحه تفرّد بالجمال بزود ميزه بريق الماس يمتاز بْوضوحه بياض الخد مفلوج الثنايا هصير العود تيَّمني بشوحه كسا ثوب الحيا نورٍ بنوره شفافيف الغلا طعم الملوحه أشوم بعيد وبقلبي خياله حبيبٍ هزّني بكثرة مزوحه ولكن الزمن غيّر مزاجه غدت نفس الكرم عنّي شحوحه أنادم ونّتي واخفي صداها أخاف بدمعتي سِرٍّ تبوحه تغيّر سَلمنا الاوّل تبدّل هقيت الناس مبداها طموحه وانا ما الوم مكتوبٍ جمعنا ولا الوم العطا ساعة نزوحه ولا الوم القدر هذا مقدّر بني آدم لقى مكتوب لوحه واقول الله يا عالم بحالي لجا بك واحدٍ زادت جروحه أقول إن كنت انا المخطي إلهي كتبت بدمعتي أرجو السموحه