السبت 19 محرم 1424 هـ الموافق 22 مارس 2003 شعر: فزّاع الشِّعر له أمجاد والبيت له مجد ومن هو يروم يوصِّل الشِّعر مجده الشِّعر له ميزه وفي ميزته عد ياما شويعر إنجلب شِعِرْ ضدّه لا تقسم الخفّاق القلب ما يْبِدّ وراعي البدايه في هوى الشوق بَدّه في فرق بين جْبال وفي فرق في النَّدْ سهلٍ رقاها بس في الفرق مدّه واذا تسنّ السيف في موعد الحد رِد السيوف و رد سيفك في غمده خَلّك شجاعٍ لا تْعَرِفْ حر لا برد لا برد حرّه ولا بَعَدْ حرّ برده وانا فهمت الشِّعر هو ما يبي قَدّ إنت الذي ترفع له الشِّعر قَدّه إن فاض سيلك فايض السيل له سد وسدٍّ يسدّ السدّ وسدٍّ يسدّه وان كان المطوّع ولا طاع وارتد يا هي حسافه كيف طايع وردّه ما يردّه إلاّ ناعس الطرف والخد ودّه يحاول يوصل الخَد.. ودّه إن جيت أطالع عيني بْعينه تسد بس يكفي انّي شفت عيني بخدّه هذي مشاعر شوق والحب والود يبغي يغيب بْعيد والشوق عنده في بسمتك (عَزّام) يتفتّح الورد كن المطر نازل على اوراق ورده ياما أضيع بشوق في ليلٍ اسود وياما يضيع الليل في شَعَرْ هَدّه يلعن مشاعر لا تجي مَدّة اليد يوقف خفوقي يوم من بس مدّه هذا بَحَرْنَا يْسَاوي الجزر والمد كلّي تساوى بين جزره ومدّه الشِّعر له أمجاد والبيت له مجد وهذا يروم يوصّل الشِّعر مجده فاءٍ وراها زين ومن عقبها مَدّ وعينٍ وْ رِدّ الزين وْ عَ الزين شَدّه