السبت 12 محرم 1424 هـ الموافق 15 مارس 2003 شعر: بنت الامارات عيني حزينه .. غاب عَنْهَا سعدْها ولا عاد للفرحه عليها مداخيل تارِدْ طواري البال مورَد سهدْها وتْصدِّرْ العَبْرات هيلٍ بلا كيل البارحه وش عاد عيني بيَدْها؟ غير إنّها ترسل بكاها مواويل غير إنها لى مَرّ ماضي عهدها تتشكّل أبيات القوافي مناديل غير إنها والدمع يفتل جهدْها تَهْوِي وتهمي من عناها هماليل تَهْوِي ولو موقي سعى في صعَدْها والعبره اللي تخنق اليوف وتْطيل زمّت .. ولو كنّيتها في مَهَدْهَا شبّت عن الطوق وْهدتني البهاذيل وا شيب روح ا لهَمّ قَطَّعْ قَلَدْها وان مالت الايام عِزّت عن الميل هجسٍ رفدها بالهموم وْوفدها زَمّ وْفَرَدْهَا بالتعب والغرابيل شاحت عن اللي عن عناها نشَدْهَا ولا تقبل الإيجاز بعض التفاصيل حنّت كما حنّة خلوي لْوَلَدْهَا شفقا على شوفه ولا من محاصيل على التي لو هي بَلَدْيه بَلَدْهَا عَزّ اللقا عنها بفرقا وتبديل عيني بليّا شوفها وا نِكَدْهَا كم تنسِجْ الذكرى حلوم وْأخاييل يوم الليالي نجتمِعْ في وَعَدْها والبدر ثالثنا على هدوة ا لليل تصفي النفوس وكل ضيق يْزهدها وتنوّر البسمه على الوجه قنديل هدّت على متلد همومي جددها وتلاحقن في موكبٍ شَرْه وِطْويل يا وجدها روحٍ تَراكَت لَهَدْهَا وان هَلّ هَمٍ تكنز الهَمّ وِتْشيل برْحِت عقب ما ودّعوها .. وَحَدْهَا! تقبل بها الضيقه ويقفي بها الويل والاّ القوافي لى خيالي وَرَدْهَا ما عاد لي فيها تسلّي وتعليل ما احس قيمه للشِّعِرْ من بَعَدْها لو جدْت بمّا رِدْت شِعْر وتماثيل