السبت 21 ذو الحجة 1423 هـ الموافق 22 فبراير 2003 شعر: قمره حبّوب طيّب والكثير يْتمَنّاه هو مِثل رذّاذ المطَرْ والسحابه هو بارقٍ تستبشر العين مسراه هو مِزْن صيف وْما رواني سرابه ما ادري وش اللي جابني له .. وخَلاّه يسْهِر عيوني واحترِقْ في غيابه كنّ الصدف لى جابته لي .. موصَّاه وش جابه لْقلبي يلين ابتلى به إن غاب عنّي ما تحمّلْت فرقاه والشوق في جوفي يزيد التهابه وان جيت أبانسى ما قدَرْت آتناساه أضيْق وآحِسّ الملل والكآبه واقول له يا بَعْد عمري ورجواه الحب نعمه يوم ربّي سخى به ويقول لي انتي هوى البال وِمْناه وْيِقْسِم برَبّه إن حبّي سطا به قلبه كبير وما اقدر أوصف مزاياه يعشق وله في كل جادِل طلابه كيف آتولّع يوم هذي سواياه كيف انكسَرْ عزمي برمشة هدابه وش لي أنا بْحبّه وشوقه ودنياه من وين ما هَبّ الهوا به بدا به لا طايله وصله ولا طلْت سلواه لَلْحين قلبي ما برى من صوابه