السبت 14 ذو الحجة 1423 هـ الموافق 15 فبراير 2003 شعر: سالم أبو جمهور القبيسي عجيبه عصافير المسا، تنثر الألوان خَضَرْ أزرَق أبيض، برتقالي، حَمَر، بُنّي عصافير، تَحْت أغصانها يبكي الفنّان وهي تسرَح وْتمرَح وتِهْتَزّ وِتْغَنّي عجيبه غريبه، كيف ما تعلِنْ الأشجان وهي شاربه من صوتي وحِبْري وفَنّي عجيبه عصافير الوفا تعْرِف النكران وانا اظنّها من قلبي وروحي ومِنّي تمنّيتها في ظلمتي تعشق النيران تخيف الليالْ وتبعِدْ أشباحها عَنّي تمنّيتها في سكتتي تنقذ الألحان تثير السما والأرض والأنس والجِنّي عجيبه غريبه ذلّت الصوت والجنحان تخاوَت مَعَ (فيل ابْرَهَه) وهْزِمَت ظنّي!