السبت 1ذو القعدة 1423 هـ الموافق 4 يناير 2003 شعر: فالح العجلان من زمان .. وْقصة المغنى حَزينه والأوادم .. عذرها .. تبغي طَرَب! والمشاعر لَفها حزن المدينه والأماني هَدها طول التعَب والنّخيل اللي ثمَرْها محترينه كل عام يمرّ .. ما تِطْرَحْ رطَبْ! ياهنوفٍ .. وَصْلَها .. تبكي سنينه العجب .. وَصْلك؟ .. وهجرانك: عَجَب! لك مكانٍ مَدْ للعَليا جبينه واستباح الصمت في لحظة غَضَبْ وكَان قصدك حُبّك اللّي تذكرينه من يخون بْذمّته تَبت وتَبْ؟ فارسٍ والريح ما تثني يمينه ما حَسَبْ للموت ميعاد وسْبَبْ عذره ان البيد ما تطوي حَنيْنَه والسما .. ما عمْرها تَمطِرْ ذَهَب وكان قصدك صدقنا اللّي تعرفينه مَن هو اللّي طول عمره ما كذَب؟! والحقيقه: «كلها الأوضاع طينه».. والأوادم .. عذرها تبغي طَرَب!!