السبت 18 رمضان 1423 هـ الموافق 23 نوفمبر 2002 شعر الشيخ محمد بن راشد آل مكتوم حم وْحِما واحما وحمّا وحامِ حامي حمى منْه الحماهْ إمْحَمومه ربع الربيع وْرابع الربع رامي ومرابعٍ في هالربيعْ إمْعَدومه ودّي بيدي قطعْ يَدّ الحرامي ويَدّ البلايا ما لها من لزومه وضاوي ضِوَى ضيهْ ولِهْ الانضمامي ضم الضميمْ إيضمهمْ في ضمومه والآخر استاخرْ في اْلآخر لزامِ يَأْخرْ عن الآخر وتظهَرْ علومه أوحَى الوحَا وحي الوحيّ الحِوامي لو هو يواحي ما وحاها تحومه وطايفْ وطا في واطيٍ فيه طامي طاف وْطفا لِهْ لى طفيفه علومه لامِنْ تحل الطفّ اْلاَول ولامِ ما اْلومه وضاع الوفا إن تلومه فيها وما فيها الوفا والتمامِ وافي وْوَفاه الوفا من رسومه شَدّ وْشدا وْشَددْ وشَدّ الحزامِ واللي ورا جدامْ جدمْ جدومه يدري ويِدْرا دارها عَ الدوامِ وِيْدور وِيْدَورْ مَعَ الدور دومه لو جال بآجال الوجال الوجامِ جالهْ جليل الجولْ واجلَى سمومه وْعَادْ وْعدى واعدى وعَدى المرامي وعاداهْ عادي عايدٍ من رقومه جايزْ يجازيه الجزاه الجزامِ وجايزْ يجوزْ بالجوايزْ علومه يكتم كتامه والكتوم الكتامِ واللي كتم كِتْمانْ كاتم كتومه ضيفٍ يضيف الضّيف والضيف ظامي يضفي على الضّيفان ضافي عزومه كامِلْ مكملْ واكتمَلْ في الختامِ ولى ما يكملْها الكماله نلومه هذه القصيدة اختبار لقرائح الشعراء، ويتوجب الردّ عليها وحلّ لغزها شعراً على نفس الوزن والقافية، وأسلوب تشابه المفردات. ترسل الردود في مظاريف مغلقة عن طريق البريد إلى عنوان مجلة «الصدى»: دولة الإمارات العربية المتحدة دبي - ص.ب 29066 ويكتب على المظروف: لغز «القصيدة المحمومة» الباب مفتوح لتلقّي الردود خلال الفترة من نهاية عيد الفطر المبارك 9 ديسمبر 2002، وحتى نهاية عيد الأضحى المبارك، في موعد أقصاه 20 فبراير 2003.