السبت 27 شعبان 1423 هـ الموافق 2 نوفمبر 2002 شعر: سالم الزمر ماني بَ.. اقلّب جمر «زيدٍ» ولا «عَمْرو» ما غير أولع بالقصيد اشْتِياقي بي يا «علي السبْعَان» من شايك السمْر سَمْرٍ وقف ما بين دربي وعاقي ذكّرتني عمرٍ تقضّى وأنا غمْر غر لِ.. هَالدنيا كثير اعتناقي واسقيتني كاسٍ خِسَتْ عندها الخَمْر من حُرّ شِعرك ما يطيب لْمذاقي وأنا مثِل نَمْرٍ ويا ويله النَمْر مجروح وسْروح الوَحَشْ في انطلاقي والعمر أشوفه مَرّ بي طامرٍ طمْر يركض وانا اركض والعجاج افتراقي والا انت توّك ما غمَرْك الأسى غَمْر وَلا سقاك الهَمّ والهَمّ ساقي هذا انت توّك فوق هِجْن الهوى الضِمْر سارح وانا عايد كثيره أعواقي بي غصّةٍ لو ذقتها قلت يا «الزمْر» يا طولْ صبرك كل هذا.. وباقي!!