شعر: صالح الشريف في وين دارك يا منى الروح والسلوان في وين عنّي تارك الهَمّ يطويني رسيت بْموانيكم وانا تايهٍ حيران صويب الحَشَا ما لاف طيب الكرى عيني أسأل عليك وخاطري للقا شفقان ونار الجوى تسري بدمّي وشراييني أهيم بْفضا ما فيه ديره ولا عنوان وسط مقفرات البيد ضاعت عناويني أدوّر عليكم واكتم الهَمّ والأحزان والشوق موياته على السيف ترميني أصارع أمواج الهوى كنني بْطوفان مويه تسيحْ بي ومويه تودّيني وانته مريح البال وِبْضامري بركان في خافقي ثارت لهايب براكيني أكتّم عن العاذل بما جال في الوجدان ودمعي يبيح اللي كتمته عن ايبيني أنا العود والعوّاد أنا الناي والألحان تولّعت في لحنك وضاعت تلاحيني أنا أحس قلبي مثلما ريشة الفنان أرْسِمْ خيالك والخيالات تغريني أنا في النهايه مش جمادٍ أنا إنسان عشقتك وماشيتك على الشدّ والليني أنا ابني صروح الود وتهدّم البنيان وتخيّب آمالٍ مضت باجْمَلْ اسنيني حسيبك الله ما بقى للوفا ميزان تبيع من يشريك في ساعه وحيني لكن صدق من قال راعي الهوى بامحان أنا طحت في فخّك وضاعت براهيني