شعر حمد بن ظاعن الكواري وش فيك ما تفهم أقِلْ لك: أحبّك يا اللي تِحِبْ غيري وانا فيك مجبور! مَلّيت من قلبٍ صخر! .. مثل قلبك وين الرجا .. في ميّت احساس وشعور كل القصايد .. تنتخي نار قربك كَنّ القصايد .. ما لها غيرك بْحور! في دفتري .. لو مقعد الشيب ذنبك فيك الشباب وفيك من بَعْثَر النور .. باقولها .. لا قَبل الشّرْق .. غربك! انّي أحبك موت .. يا حُبّ مغرور! باقولها .. لا عانق الهَجْر .. دربك وابقى على غصن الجفا ظِلّ عصفور باقولها .. لا خاصم السلْم .. حربك ومات الخفوق! .. وحارس الليل! والسور! باقولها .. من حرقة القلب .. جَنْبِك باقولها .. من شاعرٍ ماتِ بسْطور (آحبّك! .. آحبّك! .. أحبّك! .. أحبّك!) ما همّني .. لو قالوا البيت مكسور!!