شعر فهد أحمد الناصر صحيح كنتي انتصاري .. لو هزمتيني وكنتي صوابي وْخَطاي .. وقوّة حْطامي وانتي السعاده .. بْحَياتي .. وان حرمتيني واكبر جنوني .. وعقلي .. وكذبة أحلامي ما غيرك اللي أحبّه .. وان رفضتيني ما كنّك إلاّ .. خَلَقْك الله لِهْيامي أجيك عاشق .. وقلبي يسبق يْديني واموت عندك .. وعندك تشفي آلامي كم قلتي أبْعِدْ .. وعشقي فيك يغريني ولاجلك أعاند حقيقة صفعة أيّامي حتى نثرتي ظلام الياس في عيني واطفيتي .. عَنّي شموع الحب بارغامي وكنّ المشاعر بعمرك .. تلعَن سْنيني وانا شعوري يجدد لهفة أعوامي دايم معي . ما نسيتك .. لو نسيتني تقفين عَنّي .. وانا اللي أتبعك ظامي يكفيني حبّي وعشقي .. فيك يحكيني ياما نزف لك شعور الصدق باقلامي خلاص يكفي ما جاني منْك .. يكفيني لا هان قلبي عليك .. وطاح قدّامي وارجوك لا تسأليني .. ليه وش فيني؟ يكفيك إنّك .. رقصتي بْسَاحة إعدامي..