شعر: سلطان بخيت العميمي هذا إنته .. من بَعَد كِلْ هالسنين؟ وين؟ .. توّ الناس .. توّك ما افتكَرْت؟ والاّ في بالك خِطَر طاري الحنين وقلت أشوف الصاحب اللي له نكَرْت؟ والاّ رَجّعك الزمن خالي اليدين وناوي تْجَمعْ شظايا ما كسرْت؟ لا تحرّك ساكن القاع الدفين خَلّني ساكت .. يكَفي ما ذكرت وينك انته والوفا اللي قلت وين؟ أذْكر أنّك باجْمَلْ أحلامي غدَرْت واذْكِر انّك قلت لي في كلمتين كم أحبّك .. يا غلاي، وما قدَرْت في زمن فيه الوفا نادر ثمين غير أصَدقْ كذبتك .. وآخر خسَرْت والزمن عاد وتكرر مرّتين أمس أنا خسران .. واليوم انتصرت!