شعر: صالح الربيعي وش حاجتي في الشروق..؟ الشمس موجوده تشرِقْ بعيني وتغرِبْ في سما عيني ما هي بشمسٍ بتالي اليوم مفقوده شمسي غلاها وتشرِقْ في شراييني شروقها نور فيه الحب وِوْعوده وَعْدٍ يموّت غلاي وْوَعد يحييني تشرِقْ وهي بالغلا والشوق مَسْنوده مشاعر الحب تنصر ظلمها فيني كَنْها على الظلم والهجران مَحْموده جمهورها في خفوقي من يعزّيني لا صار ظلم الغلا من قلبي جْنوده وش حيلتي دام قلبي ثبّت ايديني ما تغرب إلاّ وهي بالحيل مَهْدوده من كثر ما تطعن أعماقي وتكويني غروبها جرح فيه آلام مشهوده عذاب حتى شروق النور يدعيني لو ترحل الفاتنه للغَرْب وِحْدوده طبيعي إنْها تدلّل ما تصافيني لكنّ وَرْد الغلا لا تجرح خْدوده دخيل رمشٍ بكاس الحب يسقيني دَلالها لو يطوّل تبكي وروده الله عليها تدلّل لو تجافيني دام المحبّه بها شغلات مَقْصوده تاخِذْ عيوني ونظرة حب تعطيني إي والله إن الهوى ما ترحَمْ قْيوده يسراي ما عاد تقوى فزعة يْميني لكنّها الفاتنه في القلب ملحوده إن خانت الحب قلت الله يعافيني من ذاق طعم الغلا ما يقبل صْدوده الله يسهل غلا ما بينه وبيني الشمس تغرِبْ وشمس الحب موجوده تصحى بعيني وترقِدْ في سما عيني