شعر: عوض النعيمي انت من فوق الثريّا.. انت من فوق النجوم وكل خصله من خصالك.. نجم ساطع في سماك والقصايد كل ابوها.. كلها حولك تحوم وانت تتنقّى بكيفك.. لى يعادل مستواك لك محبّه صاغها الله.. لام ربّي من يلوم كيف ما تنحب وانته شخص في روحه.. ملاك إن سألت الخيل قالت: ذاك قرمٍ من قْروم وان نشدت الشعِر.. يخشى عَ جنابه من سواك فارسٍ فيك الشهامه.. والأصاله.. والعزوم في صهيل الخيل، قلبي.. قال انّه قِدْ عناك وشاعرٍ.. والشعر كايد.. كلنا ندعيه دوم وانت غير الناس والله ما دعيته.. هو دعاك انت طب اللى حياته.. صابها كثر الهموم وكان هو في باب غيرك.. انتهى به وابتداك وانت عز اللى زمانه صار بايّامه.. يسوم ودّه إنّه طول عمره.. ما بِداه إلاّ معاك وانت سيف الحق مهما حاول الباطل يقوم لى ذكرك الحق هَلل.. ثم كبّر.. وانتخاك وانت نور الدار.. غَنت في غرامك كل يوم بادلتك الحب. وانته دوم معطيها غلاك بكل شبرٍ من ثراها.. لك مداهيل ورسوم عِزّها من عِزْ زايد.. وانت زايد في وفاك انت من ربّي هديّه.. جيت في وقت اللزوم للعَرَبْ.. للدين .. للي صام عن غيرك وجاك من نسل راشد.. وزايد قدوتك أبٍ رحوم ما بقى به مدح عندي.. وش يساوي في مداك والرجال اللي بجنبك.. حصّلوا خير العلوم يكفي انّك انت ابوهم.. يوم نالوا من رضاك جعلهم يبقون دايم.. غانمين وهم سْلوم تحت ظلّك يا السنافي.. عاش من هو في حماك سيّدي لو الشعر كلّه بين جسمي.. والهدوم ما كفاني في مديحك.. ما يوفّي عن جزاك يا عسى يا شيخ تبقى.. دايم.. وعزّك يدوم والعذر لاْن القصيده.. نجم عادي في سماك