شعر: العصري بن كراز المهيري تواعدنا وجا في الوعد يا زِيْنه مشرّفني بَعَدْ ما سمْحت ظْروفه قبَلْ يمشي يجر خْطاه يا عْوينه وقلبه من فريره ما سكن جوفه وقف جنبي وقام يْفَرّك ايدينه يهدّي رعشته ويصارعه خوفه على وجهه خجل بانت تلاوينه يعضض شفّته وِيْداري كْسوفه رفع راسه وجت عيني على عينه رخيت عْنان شوفي وانكسَرْ شوفه كأَنّا في مدار العالم اثنينه ودنيانا عن المسيار موقوفه غشتني سكرةٍ يا حسرتي شينه وحسّيت الهوى تنحرني سْيوفه تخفّى في خفايا مهجتي وينه كلامي ما ظَهَرْ خانتني حْروفه نسيت أسمي وكوني مَعْ عناوينه خشيت أنّي بحلم وهذي طْيوفه قفى واقفيت واتجرع سكاكينه غرامي والنهايه غير معروفه