شعر: ناصر خادم الكعبي السحاب بْخيل .. يا شِحّ المطر .. قفرا الأراضي العِشِب مات بْترابه .. والنخَلْ عَيّا يقاوي آه حتى موردي جَفّ وغدا قاعه بياضي يا جفاف الصمت .. نشّفت اليراع وصار خاوي عاتي الهجران يبْذِرْ شوك في سْهول الفياضي والطرايد سارحه .. والذيب من جوعه يعاوي ليه يا حظّي قساتك ما تجيني وانت راضي نِدّ ترمي لي سهامك .. ليه ما تْجيني مخاوي يكفخ الحرمان صدري والتجافي جمر لاظي إحْتَرَقْ وجه الأماني .. ورمّدت عين الهقاوي من مرير الوقت ذايق .. صابر ولا لي إعتراضي العمر ولّى وراجي مقبلاته بالرجاوي يا عسى سِحْب البشاير بالرعَد والبرْق تاضي والفَرَحْ يمطر سمانا والهنا يعزِفْ غناوي