شعر: غازي بن دخيل الله بن عون عطوني جديد الطرس والزاج واليراع بخاطب زميلي شوق زينات الازمّه لفاني منه مردود أقْبَلْ مع الذعذاع وساعة لفاني قمت أحيّيه واضمّه لفاه الرسول وجاب لي منْه في المرجاع جوابٍ غريبٍ فيه فوجيت بمطمّه عفا الله عن اللي حطني مخطٍ الأسناع وانا اهل البيان وقصدي أبيَن من الحمّه أنا عن طواريق القدا للخطا ما انصاع ولا احط فوق الحرف شَدّه وهي ضَمّه ودايم سهم قوسي فالاهداف له ميقاع يصيب الهدف ما طاح دونه ولا زمّه وانا من رجالٍ فالمعالي لهم مطلاع هل المجد مهما طال يرقون في شِمّه قلوب العدا منهم تراجف ورا الاضلاع (عتيبه) سلايل عوف ودريد والصمّه وعن سْلوم أهَلْنا البيض ما نِرغب المهزاع وعن بعض الاشيا نصرف السمع ونصمّه ولا هي من شيمنا أنّا نحط السباع ضْباع ولاَ هي من شيمنا نمدح الرجل ونذمّه وترى الجدي هو نجم السما الثابت اللمّاع يوصف به الطيّب وتعرف به اليمّه هو الجدي يعرف عند أهل نجد بالاجماع وفي دارنا الثاني وش اسمه لنا سَمّه ودايم يصير اللبس يا شيخ والنزاع لكن بالحجج وشهودها تنجلي الغمّه ذكره فالقصيد الشاعر الفارس الصعصاع هو (راكان) فارس (يام) لبّاسة العِمّه وخلف والدجيما والجنوبي وابن هزّاع وكم شاعرٍ ذكر الجدي به نطق فمّه و(فزّاع) له شان وشجاع ولد شجاع ولا يسمع أهل الحسد والحقد والنمّه والالغاز يا مشهود الاخلاق والاطباع يجيب المحار من البحر من غطس يمّه ترى (الطارده) هي عين واحلى العيون وْساع ولا انسى طراد الخيل يا طيّب الذمّه واخبّرك (بالمشكوم) يا بلسم الأوجاع تراها الحواجب وانفها أخص وآعمّه لغوزك حبوبٍ صمّه تحيّر الرمّاع واريد السموحه لو بقى حبّةٍ صمّه وتسلم عدد ما ناح ورق ولعى سَجاع وعداد التلاوه في تبارك وفي عمّه