شعر: هلال المطيري والله فيك الخير يا جرح الايّامْ والله لاموت وموقفك ما نسيته خاويتني والعمر خمسة عَشَرْ عام وش عاد باقي في الوفا ما عطيته يا كُبْر معروفك ويا كُبْر الاحلام وفّيت معروفك وانا ما وفيته ما زينْ صْدور الوَرَقْ غير الاقلام ولا شَينْ لْسَان الرجا غير ليته ليتك وَهَمْ واعاملك مثل الاوهام وليتك زَعَلْ واموت أنا ما رضيته انت العطا.. يوم العطا عَودْ أرحام في وقت لا وقته ولا البيت بيته والله ماني لا نتهى الوقت لوّام لكن بكاني حزني اللي بكيته معاهدك باللي ضمن رزق الايتام لاعطيك كل اللي بعمرك رجيته حتى خفوقٍ راحت ضْلوعه أقسام إخذه، ان كانك في محلّه لقيته!