شعر: قمره قدرت أتخيّله مرّه وتعبت أتخيّله مَرّات تَعَب يستوعبه ذهني جفاه وطول غيباته بطيت أقول وينك مِبْعِدٍ ما عاد لك جَيّات على قلبٍ تركته في هواك يْبَعْثِرْ اشتاته تمنّيت الزمن ياخِذْ ويعطيني معاك أوقات لعل العمر يا عمري يلاقي بعض ما فاته أكيد أنّي أحبّك وش عليه إذا بغيت إثبات تريد تْعَرف عن كل الغلا واكبَر علاماته أحبّك موت ما تدري أنا اللي أعشقك بِسْكات ولو عاكست تيّار الهوى ما اقوى خساراته يسوّيني على كيفه يبَدعْ له معي طلعات أنا حَبّيت ظلمه مثلما حَبّيت لذّاته لمحته أو تخيّلته أحِسّ انّه بجفني بات ولا زلت أسْمَعْ لْصوته وتنهيته وهمساته!!