شعر: علي السبعان ثلاثه شْهور لا هَبّه ولا شَبّه ولا قيفان وانا والله على ما قيل (صاحب كار) وِمْعَاني وش اللي غَيب أمهار القصيد وخاطري ميدان وطَرْفي لا اظلمت ما طاح له رمشٍ على الثاني كُبَرْت أو هو (علي السبعان) ما عاده (علي السبعان) تغيّرْ وانقتل في داخله حِلْم ونسى الجاني أحِطّ إيدي على ضْلوعي.. مكان النبض والإيمان ولا القى النبض هو الاوّل ولا ايماني هو ايماني أطالعني واعاتبني وادور لي/عَلَيْ برهان! ألاقي كل شي حولي ومن حولي ولا القاني وانا ما الله خلقني للعقال وجوخة القيطان أجي واقفي كذا.. كنّي كمالة عَدّ لاخواني أبي فِعْلٍ يقول اللي يشوفه ذي فعول (فْلان) وَلَدْ والا تَلَدْ والاّ بَلَدْ ويْصير عنواني يقولون اللسان حْصان.. عَزّ الله صحيح حْصان وانا ما هو مغربلني سوى ان حْصاني لْساني تعدّتني (كديش الخيل) والرِجْلي سرى طربان وانا مْن الظل للظلما واقول لْساني حْصاني وهذا آنا بلا شهره ولا ثروه ولا ديوان على تصفيقة الإعجاب أهيجن جوع قيفاني!