شعر: سعد بن محسن العتيبي ـ السعودية شرق وشمال وفي جنوبٍ وتغريب وين البيوت الغاليات الأديبه اللي تجازي راعي الطيب بالطيب أمشي لها لو المسافه تعيبه وارقى لها لو هي بروس المراقيب وما مرّني منها أخذته غصيبه وان كانهن جنّي بطوعٍ وترتيب ضمّيتهن ضَمّ الحبيب لْحبيبه! تمجيد تكريمٍ لراع المواجيب اللي يزيد الطيب من طيب طيبه اللي فلا للمدح عنّه مجانيب مَدْحٍ قصر عن سيّدي ويش أبي به محمد إبن راشد عظيم المناسيب الراس راشد والمناسب عريبه محمد إبن راشد عطيب المضاريب من غير جوده فيه نخوه وهيبه شيخٍ فتح بابه محبّه وترحيب ونفسه بذلها للمعالي مجيبه وان نشبت العبره وقربت محاظيب يشفيك ميقاف الرجال الرهيبه محظوظ من له في محمد مقاضيب عينه تنام ولا يزوره حريبه ومن جاه من دنياه هَمٍ وتكريب يا سعد في الضيقات من يعتزي به وللخيل ثم للشعر والطير تاديب كلٍ خذا من عطف شيخي نصيبه ومن لا يحوش الطيب من قبل تشييب ما ينفعه طيبه بتالي مشيبه وسألت ربٍ يعلم السّر والغيب أنّه على جوده وفضله يثيبه والله ما قلته نفاقٍ واكاذيب عزيز نفس ومن قبيلة (عتيبه)