شعر: حمد بن خليفة أبو شهاب تزهو وتسمو بك حرف القصايد ويا حظّ شِعْرٍ فاز معناه بِرْضاك لو باتخيرْ لك كرام الفرايد من المشاعر ما توفّي مزاياك يا محمد المكتوم، روح النشايد بك تقتبس ومضة ضيا من سجاياك نفخر بفعلك واللّيالي شهايد يا نورنا يا بدرنا لاعدمناك لك في سداد الراي أسمى العوايد همّتك تبني بك حضارات واملاك وعيناك في كسب المعالي سهايد مثل الزّواهر في مداراة الافلاك طلعة محيّاك الكريمه فوايد لاهل الوطن واللي يعيشون بِحْمَاك عليك عيد الفطر بالخير عايد واعياد دارك بك مسرّات وابراك