شعر: حمد بن خليفة أبوشهاب أنا المتيمْ فيك يا نور العيون وانته مريح الجسم والعين والبال وانا المدلهْ في ودادك ومفتون وانته مثل ما انته على كل الاحوال ما هزّعك لى هزّع أركان وِغْصون وْلا مال بك شِعْرٍ ولا وَصْف وامثال ما للعواطف تقصر الدّرب من دون قلبك.. وفينا يفعَلْ الحبّ الافعال وين انت عمّن يجعَلْ الغالي يْهون لِعْيونك اللي تسلِبْ عْقول وآجال يا ماخِذْ الأشيا على الدّوب والهون عَزّيت شان الياس واهمَلْت اْلآمال لا انته معي واتْحِسّ مثلي ياْ مَضْنون ولا انا شراتِك ما يبالي بالاهمال ما اْشوف في طْيوف الهوى لك ولا لون ألوان طيفك ما لها اظلال واشكال حَيرتنا يا مْحَيرْ قْلوب وعْيون عِقّال واصبحنا معك هوب عِقّال!