شعر: خالد علي سلطان الكعبي ذاك الاوّل والزمان أقفى وتحولْ وين كِنا ووين صِرْنا يا الأميره..!! كنت حلمٍ في خيالك ما يْتِبَدلْ كنت طيفٍ أو خيالاتٍ مثيره كنت واقع في عيونك كنت الامْثَلْ وكنت أحلى ما رأت عين البصيره! وش طرى لك يا الغَلا هل كيف تزْعَلْ كيف تزْعَلْ ع الذي حَب بْضميره تحسب انّي للزعَلْ قلبي يْتَحَمّل بالملل قلبي ترى أوقَد سعيره صدق انّي أعشقك والحب يشْعِلْ وسط قلبي شوق له عينٍ ضريره لا تمادى لاْنّ حالي في تملل والله انّي لاهْجِرك هَجْره مريره انت يا اللى بالخطا جيت وتحَمّلْ كل يومٍ لك ترى في الناس خِيْره شوفني كيفٍ معاك وكيف أعْدِلْ كيف ترضى وان تَعَبْ قلبك أجيره والله أني لاعْدِل اللي ما يْتعدّل لو قضيت أيام من عمري خطيره بس يكفي م الدلَعْ وقّف تمهلْ حَدّك اوقَفْ وانظر بعينٍ خبيره شوف (يا انته) مثلي آنا ما تِحَصلْ هيه يا انته!!.. لى بغى حرفي يثيره ذاك دربك إن بغيت البعد إرْحَلْ وان بغيت القرب لك.. فرصه أخيره خَلّ بالك.. يمكن اتْغَيرْ وافَضلْ حَدّ ثاني قد دعا قلبي لْغديره!! والاّ اقل لك.. الجديد أحلى وأجمَلْ!! عِفْت شوفك وانته عْيوبك كثيره