شعر: سالم بن علي الكعبي جَتْك روحي يا بَعَدْ روحي غريمه ساقها شوقي على درب الوهايق كان لي خاطر وفي داخِلْك شِيْمه خلها تحيا تحت ظلّك دقايق كل كلمه مِنْك عن مليون غيمه كل قطره تطفي بجوفي حرايق أعْتِبِرْ شوفك في هالدنيا غنيمه حلم ليته يوم يصبَحْ لي حقايق ضَجّ بي ظرف الهوى واشكيك ضيمه يوم هَمّ ويوم غَمّ ويوم ضايق!! لا تعنّي بالفكر خَلّك نديمه مبْ حرام يْكون بك في يوم رايق إن رضى بك خاطري ما هي جريمه ذا نصيبي يا بَعَدْ كل الخلايق ليت عندك في الهوى روحٍ رحيمه مثلما عندك على روحي وثايق كم بارزت الهوى غلْب وهزيمه وكم على شانك تحدّيت العوايق مب مهم الوقت يجعلني خصيمه المهم أحظى أنا بْشوفك دقايق