شعر: عوض النعيمي إضْحَك فديتك، وضحك عاشق عْيونك يا عَلّ هذي الشفايف دوم مبتسمه إضْحَكْ، تِبَسمْ، أنا بالحيل مجنونك وانا الذي في غرامك صادق الهمّه يا كبر حبّك بقلبٍ صار مفتونك يجري غرامك بشريانه كما دمّه وعيونه اللي بليّا حَدّ يغلونك قربك لها نور يضوي ساعة العتمه إنته أمل عمري اللي يصبغه لونك وانته لروحي من اللي صاغها نعمه ما يوم يِضْحَكْ زماني يا الغلا دونك يا حلم عمري، وجودك منتهى حلمه كامل بوصفك وكل الناس يطرونك بالطيب بالصدق والإخلاص والذمّه أمّا جمالك فهو قِدْ فاق مضمونك ما بين يوسف وبينك صارت القسمه