شعر: حمد بن خليفة أبوشهاب أَعْرِفْ ظروفك وتجهل كامل ظْروفي واحِسّ بك وانت ما تدري عن احساسي معقول ما تَعْرِفْ ألفاظي ولا حْروفي ومعقول أنّك بكلّ الّلى مِضَى ناسي يا فاقد الذّاكره كم تَخْلِف ونوفي طبعي طبيعي وطبعك نافرٍ جاسي مِنْ يِجْمَع الأمن في قلبين والخوفِ أو يجمع الماي وَالنّيران في كاسِ يا غلطتي فيك غلطة فاقد الشّوفِ لى ما يرى غير حسْن الّلون في النّاسِ باسَدد حْسابي الّلي صار مكشوفِ وبافَصلْ ثْيابي الحلوه على قْياسي يا كامل الحسن إسْمَعْ كامل وْصوفي اللي على مستواها قايمٍ ساسي أجافي اللي يجافيني بلا خوفِ وابْذِلْ لعين المحبّ المخلص أنفاسي واصافي اللي يصافيني بمعروفِ واقَدرْ اللي يقدر صادق إحساسي