بنت الإمارات الشِعِر لا هو بعيب وْلا حرام خِصّ عند اللي يعرفون القصيد له قدر عالي وله عندي مقام مثْل مقدار الحيا في قلب بِيْد ربّك اللي يوهب الشعر الأنام نعمةٍ من عند مولانا المجيد ما طرقنا به مساليك الغرام ولا رجينا مْن الشعر مَدّات إيد ورّثونا الشعر شوّابٍ جدام عندهم سلك الشعر سلكٍ فريد كمْ تغنّوا به إلى حَلّ الظلام لين يطنف ليلهم صبحٍ شريد الشعر روح البدو .. عطر الكلام والقصيد مْراية العقل الرشيد والحشيّم مثله أبياته حشام والذميّم مثله أبياته أكيد من جدود ومن خَوَال ومن عَمام ماخذين الشعِر هُبْ شيٍ جديد هاجسي يسري على حد الغَمام كنّ هذي الأرض له أسْرٍ وقيد فيه شيٍ من تصاوير الحَلام يزهل المقبل ويطرد للبعيد لايمي ليتك تزوّد في الملام حيث لاْن اللوم مهْيَاض القصيد من شَهَدْ له بو خليفه ما يُضام وْلا عليه مْن العَرَبْ زيدٍ وعيد بسّ تكفي كلمته لي يا سلام بسّ تكفي كلمته يا زين عِيد!