شعــر: الــراقيــة كلما لملمْت حالي بعثـرت الاشواق حالي اقترب منّك واشوف أن الليالي مبعداتك وا هنيّ اللي يسافر له حبيب ولا يبالي باردٍ عند المفارَقْ دالهٍ عنّي شراتك يعتري عطري حزن والكحل واحساس شالي كل شَيٍ فيه شَيٍ من هوى روحك وذاتك بس قل لي وش أسوّي لا خطر طيفك فْــ.. بالي بس قل لي وش أسوّي لا طرت لي أمسياتك يا اللي حبّك فاق حَدّه واوسع أوسَعْ من خيالي خايفه تبعد بعيد وتنقطع عنّي صلاتك علّم اللي يحسبون العشق ألعاب وتسالي كيف فز القلب منّي يوم جابوا في طراتك طرف عيّا يعتقك واحساس ما هو عنك سالي والمشاعر مقبلاتك مدبراتك مقبلاتك إن رحلت بعيد غالي وان لفيت الدار غالي تبقى في قلبي وحيد وابقى وحده في حياتك!