شعر: بنت الإمارات يومه شهد لي سيّد القوم يومه غنّت على غصن السعاده.. حمامه شفت البدر يومي عليّ بْنجومه ويْقول صبّي من قصيدِكْ مدامه لبّيه.. ما عندي عن النور شومه أقْنِعْت من وِرْد الهموم وظلامه يا وين نومه؟ طيّر السعد نومه! قلبٍ تصافق بهجته باحتدامه ما جا على باله ولا في حلومه ياخذ من البدر المفدّى سلامه مثل المطر.. وقْعه علينا نعومه مثل الشجر.. في نحر الايّام.. هامه سقياك.. يا غيثٍ تراكت ردومه القفر قفرك والعدامه عدامه ساق القنوف وْبارك الله قدومه واسْتبشرت روح المحَل والهشامه تنبت ولا.. أرض ارضعت من سلومه تنبت غلا.. تنبت رجال وشهامه هذاك لى حايز على المجد دومه ولا كلّ من عزّم على المجد.. رامه! غير (الفلاحي) يوم شمّر عزومه من كل مجدٍ فاز به في تمامه ومن هو مثل زايد؟ ومن مثل قومه؟ أُلفهْ عظيمه بين شعب وزعامه!! أسرف بحبّه هالشعب.. من يلومه؟ الله يلوم اللي على الحب لامه! في ذمّتي.. والبدر مومي نجومه في ذمتي.. والبدر مرسل سلامه إنّي تناسيت الزمان وهمومه وانّي تطيّرت الفضا ذا.. حمامه!