شعر: نسمة الغروب ألا يا رب نحنا طالبينك ونسجد لك بصدقٍ خاشعين ألا يا من كشف لايّوب ضرّه ورجَعْ يوسف بعد غيبة سنين تِحَفْظ لْنا عجيد القوم زايد سراج الدار لى به نستبين نشد العروة الوثقى عليه مدى الأيام ع طول السنين عساه بْخير دايم وِبْسَعاده وعسانا بصحته مستبشرين وننعم بالشفا دايم عليه على الشدّات يا ربّي تعين رقينا بحكم زايد للمعالي سديد الشور والراي الفطين تميّز بالعطا والخير زايد كريمٍ بالخفا دايمْ يْعين يعل همّال يسقي دوم داره وينبت فوع فل وياسمين ويسعد بالذي شوفه يسرّه حسين الدل بوعودٍ لدين عساه الشمل دايم في اجتماع ويكفيكم شرور المغرضين ويعله يْعود ع الدوله بسلامه وصلّوا ع النبي يا حاضرين