شعر: حمده بنت سعيد المروشد ـ لندن سلام لك من دهن عودٍ وفلّي باقة زهورٍ من جناين قطوفك يا اللى على طاريك دمعي يهلّي مادمت حي وملزمتني شفوفك ما لك عوض في مجمع الناس كلّي ولا كل من شفته يعوّض بشوفك انت السحايب لى مطرها يهلّي راعي الجمايل مَا نسيت امْعروفك عيد النظر يا داعج العين قِلْ لي إذا سمحت وساعفتني ظروفك نسيانكم يا صاحبي ما حصل لي تمسي وتصبح في عيوني طيوفك غالي ولك فوق الشوامخ محلّي رفعة غلا يا نافلٍ في وصوفك وعسى حياتك في نعيم التسلّي ومديم في عالي المشاريف نوفك