شعر: سالم علي الكعبي أنت الانسان يا اللى كنت ادوّر عليه وقّف الدرب عندك والمهمّه انتهت خلّني اعيش حبك خلّني اهيم فيه واهنيّا لعينى يوم فيك ألتقت أحمد الله ع شوفك واشكره وارتجيه ما يخيّب رجانا يوم قام البَخَت فيك شافت عيوني كل ما تهتويه لاْجل غيرك عيونى حرّمت تلتفت المحبه تجلّت بعد ظلمه وتيه وفوق أرض المشاعر أرعدت وامطرت عن سلوم الجهاله يشهد الله نزيه ما سعى للمعاني هِيه لاجله سَعَت كيف ما أندفع له واعشقه وافتديه والحواس بْسماته كلّها هلّلت من لطافة كلامه ما قدرت أرتويه كل ما جيت باروى فيه روحي ضِمَت لي ذكرت الليالي اللي قبل ما التقيه اتحسّف عليها ليتها ما مضت ابتدا العمر لحظة ما تصادفت فيه وبعد غفوة زماني به عيوني صَحَت