شعر: علي السبعان الله يا صبح التباشير ما اقساك ما انت ابْـ .. على خُبري صباحٍ جنوبي من غيرك.. م اللي سرق بسمة شفاك اللي من أوّل نورت لي دروبي أي الجهات اللي خذت وجهة خْطاك وايّة شفاهٍ ضخّمت لك عيوبي أية شمال اللي بنسناسه اغراك لينك رحلت وحاسديني حكوا بي نادتك (سلمى) والتفت وجهك هْناك واهملت صوتي ما تلفتّ صوبي يا صبح عوّد طال ليلي برجواك وان ما تشق الليل شقّيت ثوبي احرام ترمي فوق متني خطاياك وربي طويل ومثقلتني ذنوبي شرق جنوب وخلّ طلعة محيّاك تروي ظماي اللي تضمّه جنوبي كم قلت يا صبح التباشير ما اقساك تشرق شمال.. ومن يحبك جنوبي