شعر: عبدالله بن عامر الفلاسي سرى بي الشوق يا راشد سرى بي وْعَذّبني هوى تَرف الشبابي ولا طابَقْ عيوني النّوم سَاعه وَلا وازاك مثل اللّي وزى بي معذّبني, هوى طفلٍ صغيِّر خفيف الدّم في المعلوق غَابي صغير النّهد مَقرون الْحواجب زريف الطول منسوع الْحيابي أديبٍ, حاذقٍ, حلوٍ, لذيذٍ على كَبدي ألذّ مْن الشرابي ولا عندي من اللّي باشتكي له سواتك فزعتي نَقْوَة أصْحابي أبات الليل والعَبرات تجري على خَدّي وْخلّي ما درى بي هجرني من ثلاث اشْهر وعنّي قطع وصله ولا جا منه نابي أوصّي له واطرّش له رسايل عن الغالي ولا يرجع جوابي سوى الهجران يا راشد وصدّه ولا ادري عن حَبيبي وش نوى بي عديل الروح يا روحي عَلامك تبادرني بهجرك والعتابي ترفّق بي تراني من افْراقك نحيل الحال من عوقٍ سطا بي حبيب القلب لا تْطوّل بهجرك تراني منك في قيد العذابي ولا بانساك لو تدله وتنسى ولا باسلاك لو طال الشقا بي أنا اللّي لا ذكرت أيّام وَصْلك تهلّ الدّمع عيني بانْسكابي ولا والله قطعت الياس منّك ولا سجّيت وعيوني ترابي قدومك وَاتحَرّى لك تجيني وتاخذ فيّ أجري والثوابي حبيبي.. لا تخلّيني مْعَذّب مهيمٍ هايمٍ أنقل صوابي واصيح الدّاد من فرقاك والعي واجاوب راعبيّات الرّعابي وهذا قول, من بيّح غرامه عليكم والعفو ممّا بدى بي أنا العاشق ولا ينلام مثلي وْبحر الحب يا راشد غدى بي أسال الله يجمعني بْشَمْله مع اللّي في بحر غيّه دوى بي وصلّى الله على الهادي وسلّم عدد ما بان نجمٍ ثم غَابي