شعر: وحيدة السعوديه فَكّرت في (زايد) وزوده على الناس وايقنت ان الله على الناس زاده (زايد) ليا حوّم علي الجول قرناس كفّه تصيد سْمانها في هداده ما اكثر حراره مير هو مقدم الراس اللي تسلَّم في يديه القياده من عدل (زايد) ما على الباب حِرّاس من عدل (زايد) مهتني في رقاده ذكّرني (الفاروق) لاسجّ بنعاس تحت الظليل وحط كوعه وساده والفارسي شافه بلا جند وافراس وايقن بعدله واعترف بالسياده زايد كساه الله من الجود الالباس تضفي على (زايد) ردون السعاده كم زابنٍ يمّه من الجور واتعاس وفي ظل يمنى زايد الغيث جاده ربيع داره يوم الارياق يباس وديار غيره ممحلتها الجراده لا شفت من حوله وقوفٍ وجلاس تسبغ عليهم نظرته من وداده اليا هَرَجْ (زايد) ترى الهرج بقياس ما قل دل ومن سمع منه فاده و(زايد) علومه يا (محمّد) على ساس واليا كتب كن البحر من مداده واليا بدار (زايد) تهايلت الاطعاس والبيد وشموخ النخل في رفاده واليا ضحك (زايد) ترى العالم أوناس حَس الغريب بنسمةٍ من بلاده ومن دون مرقا زايدٍ قطع الارماس له في ذرى العليا سنام الرياده وله بالقلوب الخضر من فعله احساس دافي غلاها هو هديّة جهاده ما ترتجي به مال لو كثر الافلاس ما غير فعل الطيب هذا حصاده فكّرت في زايد وزوده على الناس وايقنت ان الله على الناس زاده