شعر: سيف السعدي حبيبي.. لو يِعَرْف الوَرْد طيبك كيف تأثيره تمنّى شَم طيبك يا حبيبي في العمر مَرّه ولو صَادَف طلوعك مَعْ طلوع الشمس المنيره تعود أدراجها في يمها وِتْغيب بالمرّه تبسِّمْك النّدي روح السّحَرْ واحلى تباشيره زرى بْدر البَحَرْ مبسَمْك وابْهَرني بْسَنا درّه وصبْحٍ ما شَرَب من وجنتك تذبل نواويره وطرْفٍ ما اكتَحَلْ من طلعتك ما ينكشف ضَرّه ولو طير القطا مَرّه لمح مِنْك التبختيره نسى دَرْز الخطى عقبك ولا عاوَد له الكرّه سِلِمْ ريمٍ نِقَلْ عينك من القانص وتدبيره شِبَحْ وانصاد صَيّاده وسِلْم الصيد من شَرّه يا حلمٍ عشت له عمري ولا حاولت تفسيره أشوف الحسن عينٍ وانت في عين الحسن قرّه