شعر: يعقوب الشامسي يا عذولي في الهوى كف العتاب والله إنّك جاهلٍ أو ما دريت تدّعي صِدق المشاعر والصواب وانت خالي لا عشقت ولا هويت إسأل اللي في عذاب الحب ذاب يا ترى ذبت بلهيبه واكتويت؟ أبكي آمالٍ تولّت كالسراب ذكرها يبقى بقلبي ما حييت آه وحزني على فقد الشباب ما على غالٍ عقب عمري بكيت يا سنينٍ تنقضي مثل السحاب كن عمري غفوةٍ فيها غفيت غادرتني لا سؤال ولا جواب من عطاها لا قبضت ولا عطيت وجرّعتني في العمر كاس العذاب وكم بغت ذلّي ولا كنّي أبيت والمشيب اللي غزا غزو الذياب كاد لي في حين غرّه ما هقيت في العوارض شاهر سْيوف وحراب يوم داهمني على الصايح صحيت ويوم موّهته سحرني بالخضاب وحل في حالي بغير اللى رجيت