شعر : سعيد خلفان الكعبي جَرِّب ترى سر الحياه التّجارب جَرِّب وخِذْ من كل علمٍ أكيده لا يوحشك ليلٍ من النور هارب واشباح ذكرى في عراها وحيده واحلام تاهت بين هَمّ وتضارب في عِزّ نشواها تهاوت شهيده أرقب شروق الشمس فوق المضارب واسأل عن اللى حَل حبّك وريده دنياك زحمه .. شرقها والمغارب والعمر واحد والليالي تبيده بين الحيا والخوف باعِدْ وقارب ومن كل لحظه عيش لحظه سعيده المشكله ما هي بماكل وشارب المشكله تحقيق شيٍّ تريده والمشكله لا صار فرشك عقارب والليل مركب والشواطي بعيده يا نور عيني لي بحبّك مآرب وآمال عَيّت تحتضنها قصيده روحي وقلبي لك حبايب واقارب طوّعت نفسي لك ونفسي عنيده لا تعتبر حبّي استراحة محارب انته قديم الحب وانته جديده وان كان عندك شَك ..خِذْها تجارب شِبّ الجمر والشك ذوّب جليده