شعر: عبد الهادي الخليوي كان أوّل الليل عبره وآخره ماطر وكل السوالف سرت للنجم مبلوله يا ليلة الضيق سيفك بالحشا باتر يا ليلة المبخره والريح والتوله يا كبر سرك من المغمور للغامر أثقلت به كاهلي مرّه ومعسوله الزيزفونه حكت لي وانجلى الساتر يا زين هرجٍ تقوله بس ما اقوله أنا أدري انها بكت حالي وانا اكابر سمعتها يوم هل الجرح هملوله كانت تقول انتهض من حيلك الفاتر ترى الليالي على الشدّات محموله تقول وش فيك هذا العبد للقادر واقول يا طول ضيق النفس يا طوله ما يستوي المهتني بالوقت والصابر اللى دروبه على الهقوات مجهوله الله يسقي زماني يوم أنا خابر كانت جميع الهموم السود مقتوله