جَرْح وِحْرُوْق

اللّه يِعَدِّيْ لَيْلِةٍ كِلَّهَا شَوْق

وِتْمُرّ لَوْ مَا مَرّ مِنْهَا كَلامِكْ

يَا اللَّى سَلامِكْ عَوْق وِمْعَاتَبِكْ عَوْق

مَا ادْرِيْ أضُمّ الْعَوْق وِالاَّ سَلامِكْ

خَلَّيْت فِيْ صَدْر الْهُوَى جَرْح وِحْرُوْق

وْخَلَّيْتِنِيْ بَيْن الْهُوَى وِاهْتِمَامِكْ

تِشُوْف نَفْسِكْ فَوْق وَاشُوْفِنِيْ فَوْق

هذَا مِقَامِيْ وِانْت هذَا مِقَامِكْ

إنْ كَانْ وَجْهِكْ لَيْل وِعْيُوْنِكْ بْرُوْق

أنَا الصِّبَاحْ اللَّى يِبَدِّلْ ظَلامِكْ

وِانْ كَانْ حِبِّكْ دَرْب وِمْوَاصَلِكْ ذَوْق

أنَا الطِّرِيْق اللَّى يِزِيْد إحْتِرَامِكْ