شعر: صوغه
يا طَرْق صوغ الحرف وابهى قلايد
وادرز على طرسك راويع عديده
الشِّعر يفخر بالرجال الفرايد
اللي لهم بالذكر سيره مجيده
محظوظ قافي والمعاني جدايد
باوصاف (أبوراشد) حروفي سعيده
يا سيّدي كل الغلا لك تزايَد
يعل الغلا لاجلك حياةٍ مديده
هذي فعالك في النواحي شهايد
مجدك سما و(دبي) درَّه نضيده
يا شاعر الفرسان لاسمك عمايد
ترقى على متن الثريَّا وحيده
يا شيخنا يا الفَذ يا خير قايد
تبقى لدولتنا حضاره تليده
منهاجك النيِّر سَرَتْ به عقايد
وطرك على وطر الصحابه تعيده
تتفقّد المحتاج وقت الشدايد
ربّي يسوق خْطَاك لاسمى حصيده
أسطورة الحاضر ورمز السعايد
بخت الوفا لا ضَخ منّك وريده
لانّك سليل قْروم.. ذرب العوايد
وانت النجيب اللي عزومك فريده
ما جبت شَيٍ من كلام الجرايد
جبت الحقايق لى بعيني أكيده
لو تنكتب فيك المزايا قصايد
تعجز على بحرك بحور القصيده