مـرحـوم

مرحوم يا (مكتوم) ما فارق النوم

عين الجريح وأرَّقْ الهَم باله

مرحوم ما هَبّت على غِصْن مشموم

ريحٍ وحَمَّلْها المعنَّى رساله

مرحوم ما ناحت حمايم لها نْغوم

تبكي على المحزون والهَم ناله

مرحوم ما نادى ورا الليل مظلوم

يا ناس وين اللي يعَرْف العداله

مرحوم ما أسقى الثرى سِحْب وِغْيوم

يفرَحْ بها راع الحلال وْحلاله

واوْرَق غصِن يابس من الروح محروم

هَزَّتْ رياح الشرق ساكن خياله

هافت غصون احباب عقبك يَاْ (مكتوم)

وامسوا على هَمٍ عذاب احتماله

واتعبت باغي الجود عقبك وْمَعْلوم

يتْعَب من اللي صار مثلك مثاله

وعينٍ بكَتْ (مَكْتوم) ما مَرَّها لوم

ورمشٍ بكى (مَكْتوم) يا ويل حاله

ويا من بكى مَهْموم إعْلَمْ ترى النوم

أشْبَهْ بدنياً زايله لا محاله

لا ضاحِكٍ باقي ولا باكي يْدوم

كلٍ ترى لا بد يوم ارتحاله

فاحرص على الباقي من أعمالك اليوم

ما ينفعك قلبٍ كثير الجهاله

ويا رب يا راحم مْعَنَّى وْمَهْموم

ياكاشفٍ كَرْب الذي كم شكا له

وانّك تجيره من عذابات وِسْموم

تغفر وتسمَحْ زَلّته وانشغاله

تسكنْه في جَنّات مَحْشوم مَكْروم

في ظلِّك اللي عَلّنا في ظلاله